Mga Eksena sa Loob ng Jeep – Part 1
Wala akong motor at lalong wala akong chikot , kaya sa araw-araw na ginawa ng Dyos, obligado akong makipagpatintero sa mga basura sa Divisoria, makipagkarerahan sa mga nagmamadaling estudyante at empleyado, umiwas sa mga snatcher at manyak sa Recto, langhapin ang maitim na usok na binubuga ng mga class at de-karagkarag na mga sasakyan.
Pero sa araw-araw na pagco-commute, hindi rin ako nakaligtas sa mga nakakatawa, nakakatuwa, nakakasuka, nakakabwisit, at nakakakainit ng ulong mga kaganapan sa loob ng jeep na aking sinasakyan. Ilan lang ang mga sumusunod sa daan-daang drama at komedya na aking nasaksihan.
Ugali ko nang sumakay sa jeep na marami pang free na upuan para nga naman makapili ako ng pinakakomportableng pwesto. Hindi ko nakasanayan umupo sa gitna. Istribo, likod o katabi ng driver na sweet lover daw, ako mahilig tumambay. Sadyang maarte lang ako at ayaw ko ng nasisiksik, maliban na lang kung kasama ko ‘yung jowa ko. Ok lang kahit pitpitin niya ako para sweet kunwari. Hehehehe.
Eksena 1 – Lola at Lolo Bukayo
Ilang beses ko nang nakakasakay ang mag-asawang BUKAYO. Ang eksena si Lolo Bukayo tatanungin ako kung byaheng Morayta ba ‘yung jeep kahit litaw na ang litid ni manong barker sa pagsigaw ng “MORAYTAAA!!!, MORAYTAAA!!!”. Syempre bilang pagalang sa nakakatanda saken, tatango na lang ako sabay smile. Pero bago sumakay ng jeep, isang matunog at malutong na SMACK muna ang pakakawalan ni Lola Bukayo kay Lolo Bukayo. O ‘di ba? Parang Kim Chiu at Gerald Anderson lang. Noong first time ko nakita ang ganitong eksena, medyo nagulumihanan ako. Minasdan ko ang aking paligid. Hindi naman black and white, hindi naman nakasuot ng baro’t saya ang mga tao, at hindi rin naman kotseng kuba ang mga sasakyan. Akala siguro nina Lolo at Lola Bukayo mga bagets sila. Pero narealize ko, bihira ang mga mag-asawang ganun ang edad na may sweetness pa sa katawang lupa. Karamihan sa mag-asawa nawawalan na ng amor. Kaya nang masaksihan ko ulit ang eksenang ito, ang naging tanong ko na, “Ako rin kaya makakahanap ng Lolo Bukayo?”
Eksena 2 – Spit Revenge
Palasak na sa Divisoria ang mga Badjao na sumasampa sa mga jeep. Armado ng tambol at nakaka-knock-out na bad odor, magsasayaw ang maliit na Badjao sa gitna ng jeep habang nagtatambol at kumakanta ng alien song ‘yun isang bata sa istribo ng jeep. Kahit hindi Christmas season, parang kabute kung magsulputan ang mga ito. At mas dumarami kapag akinse at katapusan ng buwan. Isa-isang bibigyan ni Badjao dancer ng sobre ang mga pasahero. Nakaimprenta ang panawagan at paghingi ng munting limos. Minsan na akong nagbigay ng chicken sandwich na dapat eh meryenda ko, minsan naman limang piso kapag may sukli ako. Natural na sa mga pasahero ang deadmahin ang mga Badjao na namamalimos. Pero ‘yung isang babae, nagalit, minura, at sinigawan ‘yun bata. Kinakalabit siya kasi kaya ayun winasiwas ang maputik na kamay ng bata. Bilang ganti, dinuraan ng bata ‘yung babae bago bumaba. Napangiti ako, buti nga sa kanya. Kung hindi ka rin naman tutulong, ‘wag ka na lang magsabi ng masasakit na salita sa kapwa mo lalo na sa mga taong lugmok na. Lalo mo lang pinaparamdaman sa kanila na kaawawa sila at pinandidirihan ng lipunan.
Eksena 3 – Samu’t Saring Kasabihan
Napa-ARABIRA ako sa jeep na sinakyan ko, kasi ba naman parang fiesta sa dami ng mga nakasabit sa loob nito. May dwendeng maliliit (dwende nga eh syempre maliit), maalikabok na mga parol, plastic na mga prutas, at mga kung anu-anong mga kasabihan. Ilan lamang ang mga ito sa mga mababasa sa loob ng jeep na karaniwang nakalagay sa likod ng drayber. Mga babala sa pagbabayad: Barya lang po sa umaga; God knows HUDAS not pay; Barat ang tawag sa kulang ang bayad; Basta sexy libre, sa driver lang tatabi; Yan ang pasahero alisto sa bayad ay husto; Magbayad ng maaga ng di maabala. Mga pa-sweet na linya: Miss angkinin mo na ako wag lang ang kita ko; Miss hita mo’y takpan pagkat matang maloko ang nakaabang; Basta driver sweet lover; Humandang mapisa ‘pag tumigil bigla. Para sa mga nandudugas: Sat/sun/holiday student no discount. Sa mga high-tech na jeep na byaheng Coguio-Cubao: Full d string 2 stop; Batak mo hinto ako. Mga pananampalataya: God bless our trip; Diyos ang patnubay sa ating paglalakbay. Anuman ang mga kasabihan, pambabanta, at paalala na nais ipabatid ni manong drayber, ang mahalaga ay magbayad tayo ng wasto, maging alisto, ‘wag manamantala at ‘wag magpasamantala, at higit sa lahat, ‘wag matulog sa sasakyan nang hindi lumagpas sa iyong bababaan. Hahaha! (guilty ka nu?!)
Jocellevillamor's Blog 